Jounen djeri kansè oliwon-latè
Jout-politik Ekwadò

Konte moun atè Matnik

An dekati asou 0,8% chak lanne

Lari Fòdfrans Moun Matnik nan kannaval Moun nan lari Fòdfrans Moun nan lari Fòdfrans

 

 

 

Prechè, Matnik : Nan 1e janvie 2017, te ni 372 594 moun te ka rete Matnik, nan 1e janvie 2018, te ni 368 783 moun, an dekati asou 0,8% chak lanne, mitan-o-peze eti dekantjè kontaj moun nan an peyi ka depenn anni epi kannan moun ka ladje peyi a ale rete lòtbòtsay ki piplis pase moun ka rive nan peyi a menm si tjanmay ki wouvè-zie piplis pase moun ki alelouya. Matnik ka pèdi moun li, -0,8% asou 2012 pou 2017, ek te ke ni anni 355.094 moun nan 1e janvie 2021, dapre an pòte-nouvel populationdata.net. Se bouk Prechè ki trape pi bidim rel dekati kannan-moun, -5,2 asou senk lanne, 2013 pou 2018.

Moun  zoklèt-lèspri-bòdò ka bay nan lavi aLonyen-dekantje atè-lakay-matnik la ka lonje dwèt asou de bidim tjak eti yonn se 4.500 brennbrel (tibolonm ek tifi) ki ka ladje peyi a chak lanne ale djoubake nan peyi-lòtbòtsay ek rel vini-vie a ki tro   wo, se te 84,5 nan 2017. Se pou konprann pou 100 brennbrel anba 20 lanne anlè tèt yo, ni 84,5 moun ki trape 65 lanne oben plis ; Gwadloup se 68,6 ek Gwiyann se 12,4 nan menm lanne 2017 taha. Pou dekantje, nan 2015, nan 5 peyi Karayib la (Bawbad, Kouba, Kouraso, Virgin Island sek Matnik) rel vini-vie taha anlè 80, atè Puerto Rico se 77,7 ; piplis larestan peyi-karayib ka bat nan mitan 50 ek 75.

Se pa anni pou 4.500 brennbrel ki ka pati chak lanne, se pou piplis adan brennbrel taha ki pa ka vire. Lamenm la se pou mande sav poutji yo ka pati, pou yonn ek poutji yo pa ka vire pou de ? Apre, nou pe mande sav kote yo ka ale ? Dènie mande-sav taha ka kantinen se de prèmie a, si yo pa ka vire se pou peyi-rive a ki trape plis faro ba yo peyi-ladje a. Depi nanninannan, depi apre 1945, lanne wabap dezienm semeda-longsay latè-wonn lan, piplis moun ka ladje Matnik ka ale djoubake An-Frans ; nan 2015, owonzon 2/3 moun ki te ka rete Matnik wouvè zie atè Matnik, nan 1/3 ki te ka rete nan peyi lòtbòtsay te ni owonzon 130.000 te ka rete An-Frans, 7.000 te ka rete Gwadloup, 6.000 te ka rete Gwiyann,  owonzon 1.500 a 2.000 te ka rete Kanada (ni owonzon 49.000 moun te ka rete Kanada, nan lanne 2001, ki ka teste yo ni fanmi atè Gwadloup oben Matnik) ek 1.000 a 1.500 te ka rete Etazini.

Nan 2015, se anni 7% moun ki wouvè zie atè Matnik ki pa te jenhen ladje peyi a ale rete lòtbòtsay ; nan menm balan an, 55% moun atè-lakay-matnik te ja ladje peyi a ale rete An-Frans otila yo rete, mitan-o-kontaj 11 lanne, piplis ka vire nan lanne oliwon wabap-laj-djoubake.  Si nan se lanne 1980 a 2.000 la, kannan moun te ka ladje Matnik ale djoubake ek rete An-Frans pa te ka antipile blo, oliwon 1.500 a 3.000 moun chak lanne ; dwe lanne 2002 la, kannan moun taha antipile zoup apre gouvelman franse mete sa yo te ka kriye "passeport mobilité" eti te ka flouze pasay se tibray la An-Frans pou aprann an djoubak oben vini aprann nan gran-lekol plodaye-dekantje ; ek apre, nan 2003, sa yo kriye "continuité territoriale" fini senyen Matnik. Nan 2009, gouvelman franse a kabeche an larel-gouvelnaj pou "dekatonn ekonomi peyi-dèhè-lanmè ki anba jouk li", LODEOM, eti te ka pwenti politik bawouf anlè kannan-moun se peyi-anba-jouk taha ek jik rive ba se kawbe-gouvelnaj atè-lakay la jere’y, sa fè kannan-moun ka rete nan se peyi anba-jouk taha antipile asou 13% nan 2000 pou 2008, se Gwiyann ki pran plis fè nan sa.

Lamenm la, se pou moun se wè nan de kono-zie yo, malonnekte rache-koupe, si se pa malfentri, an politik dekatonn ekonomi ek sosial ki pa fouti menyen rel-rive’y, men eti yo ka vire mete toulong, gouvelnaj franse apre gouvelnaj franse, ladwèt koubare-tòt-genyen Matnik tankon lagòch kantekantaj-sosial la jik lagòch palantjè-peyi a. Se pou se kabeche sa eti se kawbe-gouvelnaj atè-lakay-matnik la, la ka apiye de politik ki ka senyen peyi yo, ka dekatonnen lekol-aprann-djoubake ba se timafi ek se tibray yo a pou yo ale djoubake An-Frans, lòtbòtsay. Plis pase sa, ek se la an moun pou konprann ek kabeche fondokte an gouvelman natifnatal-matnik, se pou politik dekatonnen lekol-aprann-djoubake a nan kantekantaj nawflaw epi kawbe-tre djoubak la atè-lakay-matnik oben pi, wonn-ladje-wonn, kawbe-tre djoubak Gwadloup-Matnik la oben kawbe-tre djoubak OECS/CARICOM lan.        

Simao moun Wanakera       

  

Commentaires

DiYo

Yeleve lawonn. Ba mwen sèbi a pousa man sa klere lespri mwen e salye lanasyon
Vlope peze kracha mwen de fwa, man pa ni ayen an plis pou mete asou demonstraksyon misye Simawo asou sa kilakoz. Gouvelman fwanse depi nanni nannan ka pran dispozisyon y ki epi bimidom, ki larme ki toutkaltedom pousa vide peyi nou. Pousa fè sa, I jwenn soubweka atè peyi a, an seri sousèkè ki bay koudmen pou foure moun Matnik abo avyon epi ba yo biye pa vire.
Si ou le rive an lavi a se pa Matnik pou rete !
Jòdijou se yo menn ka plere zye sèk djòl kale: ..tout jennès nou ki te vo kichoy ka viv adan peyi lòt bò dlo ek selman sa ki pa bon ki rete an peyi a. Mi an mannyè pou di bwaynès nou ( tala se ta w misye Smaw! ) nou enmen y. Menn ni sa ki pa wont di si an jenn ka etidye atè Matnik se pas I pa ni nivo Inivèsite peyi ewopeyen, Etazini, obyen Kanada. Se yich fanmi malere, si yo te ni yo te ke vwayaje. An verite a fòs dekale sa nou ni an peyi a, a fòs fè reklam moun ki "reyisi" se aletranje yo ye nou ka tjwe tout lespwa an jenn moun pe ni adan peyi a eti lonbrik li koupe.

Se yo, se pa nou
Ni sa ka krye : "anmwe ni trop "blan" an peyi a", dot : "annou ale chèchè "sèzefrè" an karyib la". Men wi nou mantje doktè, nou bizwen enjenyè/ez, nou mantje moun pou djoubake anba bannan pwazon betje a, nou mantje moun pou tout travay ki pa bon pou nou "bonjan Matnik"... An finaldikont se moun an dewò ki reskonsab malè nou e se yo ke reskonsab divini nou !

Antan pasi lontan
Antan moun kòpowans mwen te ni ant 15 e 25 rekòt kafe , nou te plis ki 50% popilasyion Matnik. Sa se adan lanne 80 pou rive jik nan lanne 90. Jòdijou kopowans tala za asou chimen granmoun e ni adan ki za adan gowilozaj. Dapre sa yo ka di , se nou ki pa fè ase yich e ni trop ki pati san devire. Kouman lavi te ye ba lajenès antan tala ? I pa te dous mennsi yo te ka ba nou medikaman Zouk la. Antan tala pi gwo mòso adan popilasyon peyi nou te envizib pase dowlis gran lajounen. Peyi a te bon pou sa ki te rive tete lajan 40 pousan an leta fwanse te ka ladje ba yo sanmanman. Men apresa sa ki te rete? Travay ba betje djòl ou ke bave men janmen bò kay ou ke ni an pave. Ou pa te ni kat PPM, ou pa te ni kat ladwat, fanmi w pa te ni filon pou yo te sa foure w vitman prese adan an tou., lakilti sete lajounen fonksyonè laprefèkti , ledikasyon epi leswè annou voye monte.. Sa ki te rete w si w ou pa te le pri an tè sèk kon kayali antan Karèm?

E jòjidou ? Vive LaVendée...
Limen televizyon gade asou se 50 000 chanèl la( antan nou te ni yonn ) epi gade wè.
Siklonn, si ou pa sav ou Matnik ou se konprann se laVendé (an depatman la Fwans) ka pran siklonn. Misye metewo, misye jandanm, misye prefe ka bat bouch yo, yo konnèt siklonn dapre yo... epi kanmenn an ponpye sere an fon an ka sanm tougare la. Annou pa manti ni 30 lanne di sa man ka sonje chef ponpye sete misye Palcy. An mirak se pa te an vandeyen. Men nou tout la pa ka fè ponpye. Vire pa kote ledikasyon, wi an patje solda men si ou gade se ofisye a se toujou laVendee ki "reprezant!" Tansyon, jòdijou ou pe ni vandeyen ki ni fidji moun peyi a.
Kazèn jandam adan letwant4. : Yen ki vandeyen. Monte Lamena : vandeyen ka fè siwawa ! Kivedi pannan an seri nèg gwofal te ka fè jenès peyi a pran disparèt , vandeyen yo menn te ka fòwmè jenn vandeyen pou yo te sa kowe divini peyi yo. Men sa ki fò se ki Lavandé pa janmen moli an may pou voye lèd imanitè atè ti peyi Matnik la. Gade sa ti bwen : enjenyè, enfimyèz, doktè, jandanm, profèsè, kine, boulanje e kisa sa ye ankò... Nou menn nou pa janmen fè ayen pou Lavande. Bann engra!

Pale pou Pale
Lè an zagaya ka fèse kò y atè pas I le an bagay tout manman e papa ki sav pe ke menn leve y digad, pa menn an kout zye ! Sa ki pa sav obyen pa le sav yo ke pale ba y, ba y de tap.. Djendjen. Se menn bagay nou ka wè adan peyi nou. Voye monte, moun tèt cho, jouwe manman moun, men an finaldikont se djendjen, pèsonn pa tann pèsonn pa leve lavwa dèyè. Pou ou sa chanje an sistèm ki pa bon pou wou fò ou kontwol li. Se pa wou ka boulinen, se pa wou ki mèt je a. Djendjen lè ou lonje dwèt asou vandeyen an. Se ou menn ki ale chèchè y. Lide w pa janmen di w ale chèchè yich peyi a. Menn mannyè leta fwanse fè moun peyi a travèsè, poutji nou pa ni an biwo pou fè moun vire. Nou ni sè e frè ki fèt an fwans, ki elive an fwans ki plas nou ka ba yo an peyi yo. Ki mannyè nou ka lonje lanmen ba yo...
Misye Aliker te di : meye espesyalis Matnik, se moun Matnik", menn bagay, meye divini peyi nou se nou moun Matnik ke bay li, se pa yich an lot peyi. Yo ni ta yo pou fini konstwi, ta nou an avan I menn konstwi, ni sa ki ke krazè y toutan nou rete bwa kwaze.

DiYo Laban

Carib.News

Jamaican artiste Daddy U Roy died of diabetes and hypertension at the University Hospital of the West Indies in St Andrew on Wednesday night. He was 79.

Vérifiez votre commentaire

Aperçu de votre commentaire

Ceci est un essai. Votre commentaire n'a pas encore été déposé.

En cours...
Votre commentaire n'a pas été déposé. Type d'erreur:
Votre commentaire a été enregistré. Poster un autre commentaire

Le code de confirmation que vous avez saisi ne correspond pas. Merci de recommencer.

Pour poster votre commentaire l'étape finale consiste à saisir exactement les lettres et chiffres que vous voyez sur l'image ci-dessous. Ceci permet de lutter contre les spams automatisés.

Difficile à lire? Voir un autre code.

En cours...

Poster un commentaire

Vos informations

(Le nom et l'adresse email sont obligatoires. L'adresse email ne sera pas affichée avec le commentaire.)