Jout-politik atè Chile

Gabriel Boric pase epi 55,87% feyèt-vote

 

 

 

 

 

 

 

Santiago de Chile: Apre Servel (Servicio Electoral eti se kawbe-gouvelnaj jout-politik peyi a) dekachte 99,96% se fèyèt-vote a, se Gabriel Boric, joutè-politik Apruebo Dignidad (an lawonn politik ki ka sanble an tilili krèy politik depi gòch kretjen an, Izquierda Cristiana, jik gòch san-chenn lan,  Izquierda Libertaria pase  nan krèy-politik laliwonnis la, Federación Regionalista Verde Social, epi  Krèy Kominis Chile a, Partido Comunista de Chile) ki genyen, ladje-bòdaj-ale, epi 55,87% feyèt-vote a. Se 55,63% (8,2 milion moun) adan plis pase 15,03 milion moun ka vote atè Chile ki te vini vote nan dezienm wonn taha eti te ka mete kabwatè-politik Apruebo Dignidad  a nan jout epi José Antonio Kast (Frente Social Cristiano, ladwèt koubarè toumbilaj sosial, ek nan gloriye A. Pinochet) eti te rive douvan nan prèmie won lan epi 2,08 rel-konte douvan Gabriel Boric.

Apre bidim genyen-flouz li a, Gabriel Boric te pran pawol epi kabwatè-repiblik douvan an, Sebastián Piñera, eti y fè tann se pou ranbonni lavi se pi malere a, pou rive nan an Chile pi kantekant nan sistenm-tribinal ek pi kalibiche. "Man ke mete tout djokte mwen pou doubout douvan katel taha (...) nou ni anchay bagay pou fè pou rive jik bout nan janbe-doukou taha ek rive nan an topay epi tout moun-peyi-natifnatal Chile a", se sa kabwatè-repiblik fini-rive a plodaye. Kabwatè-repiblik la nan bout gouvelnaj la, Sebastián Piñera, te mare konsit pou depenn gran liy-ale djoubak, dwe lendi.  

Lamenm apre Servel kouri-nouvel asou kontaj jout-politik la, kabwatè-repiblik nan gouvelnaj la te bat do Boric pou genyen nèt li a ek trape an tjè-senyen ba  José Antonio Kast pou bat-lawonn politik li. "Boric ke kabwatè-repiblik tout moun-chile. Jòdi a, plis pase 8 million moun-chile ale vote, se pi bidim ale-vote depi anchay tan ek se an djing-kòtok pou demokrasi", se sa eti Sebastián Piñera rete katjile, ek pou te dilere tout pàs rèch eti gouvelman pase, "gouvelnen se pa redi chèz bò tab, nou te trape anchay dekou fann-tèt ek magre tout katel-pran-lanmò, nou pa jenhen moli an may". Apre dal eti y pran an, joutè ladwèt lanmen-gante-fere a koki zie y anlè pwent pie y ek mande moun ki vote ba y pou bat toulong pou ranbonni Chile. An konpanyi moun Santiago lonje dwèt anlè piziè liy tonbe-leve ki pa te ka mache ek kore moun nan fè-debouya ale vote yo.

Epi anni 35 lanne anlè tèt li, Gabriel Boric Font eti te yonn adan se kabwatè leve-doubout brayès 2011 lan pou an sistenm-lekol ek an sistenm chaye-moun nan metro san lahan-peye, tankon konpayel-politik Izquierda Autónoma (La-gòch apiye-asou-pwa-kò-moun) nan 2008-2016 ek apre, nan 2016 pou 2019, konpayel-politik Movimiento Autonomista ki fonn nan Convergencia Social  nan Me 2019, ansanm epi   Izquierda Libertaria, Nueva Democracia ek Socialismo y Libertad eti yo tout adan Frente Amplio jik jòdi, Gabriel Boric vini kabwatè-repiblik pi brenbrel nan tout tan-nanninannan-longsay Chile a, se prèmie kou an kabwatè-repiblik te ka trape tousa feyèt-vote, 4.619.222 feyèt-vote anlè tit-fanmi li.  

  

Ale li nan TeleSur ek Prensa Latina          

Comments

[Rédigé par : El Caracol del Caribe]

El CNE de Honduras proclamó oficialmente a la representante del partido hondureño Libertad y Refundación, Xiomara Castro, como la primera presidenta electa del país.