Jout-politik kabwate gouvelman oliwon Brazil

"um único e grande vencedor: o povo brasileiro"

 

 

 

 

 

 

 

 

 

Brazilia, Brazil : Se Luiz Inácio Lula da Silva (Partido dos Trabalhadores pou Krèy-leve-doubout-politik se djoubakè a) ki ke gouvelnen nan Palácio do Planalto pou kat lanne ka vini, apre y  genyen jout-politik kabwate gouvelman oliwon Brazil pou twazienm kou a. Lula pase epi 60.345.999 vwa (se te 57.238.986 vwa nan prèmie wonn lan), se 50,90% moun ki vote kòtok ek se 2.139.645 vwa douvan kabwatè-gouvelman nan lanmen-gouvelnaj J. Bolsonaro (Partido Liberal),  ki trape 58.206.354 vwa (se te  51.068.260 vwa nan prèmie wonn lan), se 49,10% moun ki vote kòtok.

Nan dekou Jounen Lang ek Mès-longsay-peyi Kreyol Oliwon-latè a

Diksionnè kreyol/franse

 

 

 

 

 

 

 

 

 

 

Se diksionnè se pa anni pou ba moun an zie-klere asou lang lan ; men, plis pase tout bagay, pou dekate an liannaj bòdò nan mitan se tit-langayele lang lan, se ti-pawol la, se pawol-pale a, se lavwa-egal la, se pawol-badjole a, se toumbele-lavwa lang lan, sonnen-lavwa ek jik  se jès lang lan, anchouste lang-matje a pou lang lan se rive, sistenm-lang, kantinen lang-pale a ; pou lang lan se vire pimpe toulong ek chape anlè lang-sistenm eti y anba jouk li a, chape anlè sistenm-gouvelman antra a eti ka gade wè fè y djigilòp anfwa. Nan rive nan rel sistenm-lang taha, bagay ka ladje rel-doubout  lang kreyol la nan chimen, se pou se konprann an tilili liannaj nan mitan se tit-langayele, pawol-pale, ti-pawol, lavwa-regle, toumbele-lavwa-lang, pawol-badjole ek sonnen-lavwa, tousa, ki ka vire trase an tan-nanninannan-longsay ba lang lan, eti, plis pase an karetel-ale, depi nanninannan jik lajounen-jòdi, atjolman-la, ka vire kare lang lan kòdjòm nan laliwonn lang li (laliwonn karayib li isiya la konsa) ek nan tan-ka-pase. Se pou se, dwe isiya la konsa, sispann plenyen asou an mete-larel amerik tjek bagay ki leve atè Ewòp (plodari kreyolis la) oben, pi bwabwa ankò, tjek matjoukann-afrik, lang-pale afrik ki te ke vire leve nan an peyi-karayib ; an lang-pale se toulong an sistenm anchouste nan an laliman fann, owala laliman taha se foukan anba y, se pou y djigilòp, lamenm oben vini an pale-kadafa.

Prèmie konsit Karayib asou rete-kouche-kalbòy san-se-apre-kontaminaj

Kouri-nouvel CARPHA 

 

 

Kingston, Jamayik :  "Pou nou menm nan peyi CARICOM, rete-kouche-kalbòy san-se-apre-kontaminaj se an chay-pòte depi tan-fè-tan, tan-kite-tan. Ja lè pou nou mete nan brann, san patate, goumen san moli an may, ek sove lavi moun lajounen-jòdi ek yich-dèhè", se sa Dk.  Joy St. John eti se sobreka-kabwataj CARPHA (Caribbean Public Health Agency) bàt nan dekou prèmie konsit peyi-CARICOM asou se rete-kouche-kalbòy san se apre kontaminaj, bay-nannan, sokodong lèspri ek vidjozay djokte ale-vini. Rel-kantinaj djabèt la, tansion an ek dòt rete-kouche-kalbòy san-se-apre-kontaminaj, ek dòt janjol pou se rete-kouche-kalbòy rive blo anlè moun, se an bidim tjak sokodong ba gouvelman se peyi Karayib la.

kabwatè-gouvelman CARICOM

Plodari kouri-nouvel politik asou Ayiti  

 

 

 

 

 

Georgetown, Guyana :  Se kabwatè-gouvelman CARICOM lan dekachte an lèt-kouri-nouvel eti Ariel Henry, kabwatè-gouvelman Ayiti nan kawbe-gouvelman, te voye ba yo, otila y mande an kole-zepol ek an lanmen-lonje pou se kore titak banbann doubout-moun, pase-wel, politik ek ekonomi ki ka bay nan Ayiti. Kontribannè bare chimen chaye gazolin, nan anchay laliman peyi a, ek sa fòse anchay lekol ek lopital fèmen lapòt ; ek ponp-dlo ki rete ponpe dlo fè moun pa ni dlo-pou-brè. Pou dlo ki pa ni, kolera vire ka kouri, nan laliman-kay malere plis pase dòt kote.

Nan dekou 530enm lanne-vire debatje Kristòf Kolon an

Jounen fè-kakol palpa-moun-peyi-nanninannan

ek dezanjoukaj-politik

 

 

 

 

Karakas, Venezwela: Gouvelman Bolivar Venezwela a mete Jounen 12 Oktòb la eti lanne taha te ka matje 530^enm lanne-vire Kristòf Kolon epi se boulouwè ewòp la te debatje anlè kontinan-amerik la, Jounen fè-kakol se palpa-moun-peyi-nanninannan kontinan-amerik la ek dezanjoukaj-politik (Día de la Resistencia Indígena y la Descolonización de América) pou, nan plodari Nicolás Maduro eti se kabwatè-repiblik la atè Venezwela, gloriye "djokte nanninannan ek lèspri pimpe-douvan se palpa-moun-peyi-nanninannan an".

Lanne hourakàn ek toumvas la

Julia vire vini gren-vante

 

 

 

 

 

 

Panzós Alta Verapaz, Gwatemala: Julia eti vire vini an gren-vante (boulin van anba 62 km/hè) alelouya 28 moun nan Amerik-mitan-kontinan, 14 moun atè Gwatemala, 4 moun Honduras, 9 moun atè El Salvadò ek mil-an-mil lapidanm nan kare-peyi a. Nan lanbouk Panzós Alta Verapaz (71.846 moun nan 2018), se nan laliman anlè-solèy peyi a, 5 moun alelouya-akasia-lata lè an tè-koupe kouvè kay yo ek nan kare-lanbouk Huehuetenango (1.371.676 moun nan 2020), 9 moun neye eti yonn adan yo se te an sobreka defann-laliman-peyi ki te ka janbe lawviè lonje lanmen ba an moun.

Dizienm kout-van lanne hourakàn ek toumvas la

Julia, an toumvàs ka bàt lanmè Karayib la

 

 

 

 

 

 

La Guajira, Kolonmbia: Julia se an kavalad tropikal ki tounen toumvàs  a oliwon 175 kilomèt anlè-solèy La Guajira ( yonn adan se 32 kare-lanbouk Kolonmbia a, 880.560 moun nan 2018) ek te ka bàt lanmè Karayib la, a 29km/hè, nan an karetel anba-solèy, asou chimen Nikaragwa, Honduràs, Salvadò, Gwatemala, Beliz ek Meksik. Boulin se van an se oliwon 65 km/hè ek se dekantjè toumvàs INAMEH (Instituto Nacional de Meteorología e Hidrología) gouvelman Bolivar Venezwela a, ka wè y vini hurakàn rel 1 dwe seren Sanmdi a ek vire towblip toumvàs nan pipirit Dimanch lan konsa y ke janbe se tè-danme Nikaragwa a, depi Bilwi jik Cabo Gracias a Dios, atè Honduras.

Kolera vire pimpe nan Ayiti

 Senk moun kalbòy ek yonn alelouya 

 

 

 

 

Pòtoprens, Ayiti : Kawbe-gouvelnaj doubout-sokodong lan nan gouvelman Ayiti konte an kannan 5 moun ki kalbòy epi kolera, an moun ki alelouya-akasia-lata ek 52 moun ki ni se djing kolera a. Dapre lonyen-dekantje a, 33 adan se moun taha anba 19 lanne ek 4 pòhò trape an lanne, 41 moun kouche anlè kabann-lopital. Se Site-Solèy, an kare-kay malere anlè-solèy Pòtoprens ki pi pri anba kolera a epi 33 moun nan lonyen-dekantje, lanbouk Pòtoprens menm ka konte 11 moun, Petyonvil ni 3 moun ek Delmas ni de moun. Lòtbòtsay ni an moun anba lonyen-doktè atè Mibalè, nan kare-lanbouk Mitan-Ayiti a ek se pou gouvelman te mande palpa-moun-doubout Ayiti pou respekte larel-koumandaj gouvelman pou kore chenn-kouri kolera a.

Jout-politik kabwate gouvelman-oliwon Brazil

Tèt-chouval Lula douvan epi 48,42% fèy-vote

 

 

 

 

Brazilia, Brazil : Apre TSE (Tribunal Superior Eleitoral, kawbe-gouvelnaj jout-politik oliwon Brazil) dekachte 99,97% fèy-vote, ke ni an dezienm wonn nan jout-politik pou kabwataj gouvelman oliwon Brazil, nan mitan Luiz Inácio Lula da Silva (Partido dos Trabalhadores pou Krèy-leve-doubout-politik se djoubakè a) ki trape 48,42% (se 57.238.986 vwa) adan se fèy-vote a, epi Jair Bolsonaro (Partido Liberal), 43,20 fèy-vote (se 51.068.260 vwa) ki te kabwatè gouvelman oliwon Brazil douvan. Simone Tebet (Movimento Democrático Brasileiro, partido pega-tudo -tout larel-lide politik abò) rive twazienm epi 4,16% fèy-vote ek Ciro Gomes (Partido Democrático Trabalhista, sosial-demokrat) rive katriyenm epi 3,04% fèy-vote. Tout larestan joutè-politik te anba 1%.